Hvammi 6. janúar 1903

Kæra Sigga mín!

            Ekki komumst við lengra en að Fornahvammi í gær frá Fögrubrekku. Ferðin var afbragðsgóð yfir heiðina suður að Hæðasteini; eptir það voru öðruhvoru élar ofan í heiðarsporð, en við fengum skafbál yfir allar hæðirnar og enn verra ofan dalinn frá sæluhúsinu, svo að við gátum ekki lagt upp að eiga við að fara lengra í gærkveldi en að Fornahvammi, með því að við töldum okkur víst þar sem færðin er svona góð að ná suður af þessa vikuna.

            Ég hefi eins og við er að búast ekkert frjett enn að sunnan, og frjetti það sjálfsagt ekki fyrr en ef það verður í Kjósinni; ég er að verða loppinn svo að ég slæ hjer í botninn.

Vertu ætíð margblessuð og sæl

ætíð þinn

Þorvaldur Bjarnarson

 

Berðu bestu kveðjur, og biddu piltana að muna mig um að láta ekki veturgömlu trippin berjast lengi úti í harðviðrum og hörku frostum, sem allt útlit er fyrir að hann sje nú að ganga yfir sig.

Þ.B.

Athugasemdir

[Óskar Helgi Helgason (IP-tala skráð) 12.1.2008 kl. 01:02]

Heil og sæl, Sigríður Klara !

Skemmtilegt; hversu þú heldur tengingu góðri, við þína forfeður, sem formæður. Myndrænar lýsingar, sem glöggar frásagnir, frá þessum liðnu tímum. Mjög áhugaverð síða, hjá þér.

Með beztu kveðjum, úr Árnesþingi / Óskar Helgi Helgason, frá Gamla Hrauni og Hvítárvöllum

[Sigríður Klara Böðvarsdóttir, 12.1.2008 kl. 20:11]

Takk fyrir áhugann Óskar Helgi.

Það hefur lengi verið ætlun mín að rita þessi bréf upp og nú er ég komin með árs verkefni. E.t.v. lauma ég einnig inn ljósmyndum úr sama safni.

 Skemmtileg tilviljun að bloggið þitt sé undir svarthömrum, því ég bý einmitt að Svarthörmrum...

Sigríður Klara 

[Finnur Jóhannsson Malmquist, 21.2.2008 kl. 02:20]

Fagrabrekka yfir að Fornahvammi, væntanlega ferð yfir Holtavörðuheiðina? Kem ekki Fögrubrekku fyrir mig, hvar er sá bær, rétt norðan Brú í Hrútafirði? Drjúgur spotti á hestbaki og það í janúarbyrjun.

[Sigríður Klara Böðvarsdóttir, 21.2.2008 kl. 09:18]

Rétt, Fagrabrekka er rétt norðan við Brú í Hrútafirði, á ská til móts við Staðarskála.

Ástæða ferðalagsins í byrjun janúar er berklaveik dóttir Þ.B., eins og kemur fram í bréfinu á undan, en bréfaskifti þeirra verða birt hér á síðunni í árslok.